අපේ අසල්වැසි ඉන්දියාවත් මෙම තරගයට එක්වුනේ තම රටේ ඇති ලෝක ප්‍රසිද්ධ ටාජ්මහාල් මන්දිරය ඊට එකතු කරමින්. අවසානයේ එය පුදුම 7 තුලට එකතු කරගැනීමට ඔවුන් සමත්වුනා. නව ලෝකයේ පුදුම 7 මොනවාද යන්න මෙම විකි ලිපියෙන් බලාගන්න පුලුවන්.

තම ටාජ්මහාල් මන්දිරය මෙම තරගයෙන් ජයග්‍රහණය කරවනු වස් ඊට මනාප ලබාගැනීමේ ව්‍යාපාරයේදී භාවිතා කල තේමා ගීතය ගැන තමයි මේ කියන්න යන්නේ. රකීබ් අලාම් විසින් රචිත මේ ගීතය සංගීතවත් කලේ ඔස්කාර් සම්මානලාභී ඉන්දියානු සංගීතඥයා වන ඒ. ආර්. රහ්මාන් විසින්. One Love හෙවත් Taj Anthem යනුවෙන් පොදුවේ හඳුන්වන මෙම ගීතයේ වඩාත් වැදගත්කම වන්නේ භාරතයේ ප්‍රධාන භාෂා 6කින් ගැයෙන විවිධ අනුවාද 6ක් නිර්මාණය වී තිබීමයි. මේ අනුව හින්දි, දෙමළ, මළයාලම්, තෙලුගු, කණ්නඩ හා බෙංගාලි යන භාෂා 6න් මෙම ගීතය ගැයීමට රහ්මාන්ට සහාය වන්නේ කාර්තික් සහ නරේෂ් අයියර්.

ගීතයේ variations 6 පහත දැක්වෙන ලින්ක් වලින් ඩවුන්ලෝඩ් කරගන්න පුලුවන්.

One Love – Ek Mohabbat (Hindi)
One Love – Kaadal Ondrallava (Tamil)
One Love – Pranayam Onnu Allo (Malayalam)
One Love – Prema Okkatega (Telugu)
One Love – Premavu Illi Onde (Kannada)
One Love – Bhalobasha Ek Hoye (Bengali)

මොකද ඔබ හිතන්නේ මේ සිංදුව ගැන?

මෙන්න ගීතය,

අහසෙ ඉන්නවලු, ගහේ ඉන්නවලු
කුටියෙ ඉන්නවලු, නොදැක වඳිනවලු
ගින්නෙ නටනවලු, බෙර පදට නටනවලු,
නටල වඳිනවලු, පව් ! පිහිට පතනවලු

ඩෙන්න ඩෙනා ඩෙනෝ. . නා ඩෙන ඩෙන ඩෙනෝ. . .

පෙරලි පෙරලි වඳින තාලෙ දුක හිතෙනව මට
බණ දහමක් වත් නෑ මම දෙසුවේ කිසි දින
හේනක් කුඹුරක් වත් නෑ වගා කළේ මම
අනේ එපා මට ලැජ්ජයි නටල වඳිනකොට

මෝල්ගහේ දලු එනතුරු, කලු කපුටා සුදු වන තුරු
යදින යැදිලි වඳින වැඳිලි ගල් හදවත් උණුවෙනතුරු
පොතක් පතක් ලීවෙත් නෑ ගහක් කොලක් හැදුවෙත් නෑ
අසවල් හොඳ කරලත් නෑ අනේ අනිච්චං !

ලයනල් රංවල, සමන් සිල්වා සහ පිරිස – අහසෙ ඉන්නවලු

ගීතය ගැන කිව්වොත් මේක නැසීගිය ජනසංගීතවේදී ලයනල් රංවලයන්ගේ නිර්මාණයක්. එතුමාගෙ මුල්ම ඇල්බමය ‘අහසෙ ඉන්නවලු’ යනුවෙන් නම් කර තියෙන්නෙත් මේ ගීතය නිසයි. මේ ගීතයේ මම දැකපු වැදගත්ම දේ තමයි ‘තුට්ටු දෙකේ’ බයිලා ගායකයෙකු ලෙස වැඩි දෙනෙක් හිතන සමන් සිල්වා ගායනයට යොදාගැනීම. මගේ අදහස නම් ඔහුගේ හඬ මේ ගීතයට සාධාරණය ඉටු කර තියෙනවා.

අර්ථය ගැන කථා කලොත් ඉතින් නිරර්ථකව දෙවියන් වැඳීම අද සමාජයේ කොයි තරම් බහුලව තියෙනවාද කියලා අමුතුවෙන් කියන්න ඕනේ නෑ නේ.පන්සලක පවා ලොකු තැනක් ලැබිලා තියෙන්නේ දේවාලෙට. ඒ විතරක් නෙමෙයි, බෞද්ධයන්ගෙ පූජනීය ස්ථානයක් වන ශ්‍රී පාදස්ථානය ප්‍රදේශයේ වැඩිපුර කියවෙන්නේ බුදු හාමුදුරුවන්ගේ නම ද? නෑ.. සමන් දෙවියන්ගේ නම! මේ ගීතයෙදි දෙවියන් විසින්ම තමන්ට අන්ධව වැඳුම් පිදුම් කරන මිනිසුන්ව හාස්‍යයට ලක් කිරීම තවත් කරුණක්. ‘ගම අවුලඤ්ඤං’ ප්‍රසංගය බලපු අයට මතක ඇති මේ ගීතට කොයි තරම් අපූරු රංගනයක් ඔවුන් ඉදිරිපත් කලාද කියලා.

අනිත් අතට ගත්තොත් අපි දේශපාලකයන් වෙනුවෙනුත් කරන්නේ මේ ආකාරයේම අන්ධ වැඳුම් පිදුම් කිරීමක් නේද? ඔවුන් අපිට කරපු සේවයක් ගැන අපි හරියටම දන්නෙත් නැති උනත්, මැතිවරණ කාලෙට ටීවී එකේ කියන, දැන්වීම් වල පෙන්නන දේවල් වලට රැවටිලා අපි ඡන්දෙ දෙනවා. මේ ඡන්දෙදි අපේ දෙපාමුල පෙරලිලා මනාප ඉල්ලන්න තරම් සූදානම් බවක් පෙන්නන අපේක්ෂකයා ආයෙ දකින්න ලැබෙන්නේ ඊලඟ මැතිවරණෙදි. අවසානෙදි ඔවුන් අපිට කරපු හොඳකුත් නෑ, අපිත් රටත් හිටපු තැනමයි. දියුණු වුනේ ඔවුන් විතරයි. ඒත් අපි ආයෙ ආයෙත් ඡන්දෙ දෙනවා. ඔවුන්ගෙන් පිහිට පතනවා, ලැබෙන පිහිටක් නැති උනත්. මේකත් දෙවියන් කෙරෙහි තියෙන අන්ධ භක්තියට සමානකමක් දක්වන්නෙ නැද්ද?

නමුත්, මේ ගීතයේ එන දෙවියන්ට වගේ, මිනිසුන් තමන්ට අයත් නැති ගෞරවයක් දෙන බව දේශපාලකයින් තේරුම් නොගැනීම තමයි තියෙන එකම වෙනස. මොකද වැඩි දෙනෙක් හිතන්නේ ඔවුන්ට වන්දනාමාන කිරීම හුදී ජනයාගෙ වගකීම කියලා.

දන්න තරමින් මේ ගීතය ලිව්වෙත්, රංවලයන්ගේ ගීත වැඩි කොටසක් ලියපු, සිසිර දිසානායක කියන ගීත රචකයායි.

දස්කොන්ගේ පියා, ගැස්කොන් කියන්නේ ලංකාවේ වෙරලට පාවී ආපු ප්‍රංශ නැවක සේලරුවෙක්. දෙවැනි රාජසිංහ රජු විසින් මේ නැවියන් අල්ලා සිර කෙරුනු ලැබූ අතර කාලයකට පසු ඔවුන්ට නිදහස ලැබුනා. එවිට මේ ගැස්කොන් උඩරට ප්‍රදේශයට සංක්‍රමණය වෙලා එහි සිටි පෘතුගීසි කාන්තාවක් හා විවාහ වුනා. මේ දෙපලට ලැබුනු දරුවා තමයි පේදෲ ගැස්කොන් – හෙවත් අපේ සිංහල මිනිසුන්ගේ කටවහරට හුරු වූ විදියට දස්කොන්. මේ කාලේ සිංහල රාජසභාවේ විදේශිකයනුත් හිටියා. ගැස්කොන් පවුලත් ඒ ආශ්‍රයෙන් තමයි රජවාසල හා කිට්ටු වුනේ. දෙවැනි රාජසිංහ රජ පුත් ශ්‍රී වීරපරාක්‍රම නරේන්ද්‍රසිංහ කුමාරයා සමග කුඩාකල සිටම මිතුරු වූ දස්කොන්ට පසුව මේ කුමරා රජ වූ විට අදිකාරම් තනතුරකුත් ලැබුනා. කවියෙක් වුනු දස්කොන් මේ අතරතුර කවි ලිවීමේ දක්ෂතා තිබූ රජුගේ ප්‍රමිලා බිසව සමග හාදකමක පැටලුනා.

මේ කාලයේ රාජසභාවේ හිටපු විදේශිකයෝ සිංහල රදලයන්ට, සංඝයාවහන්සේලාට විරුද්ධව කුමන්ත්‍රණ කල අතර සිංහල රදලවරුන්, සංඝයාවහන්සේලාත් අනිත් අතට විදේශිකයන්ගෙන් පලි ගන්නට මාන බැලුවා. මෙන්න මේ ගැටුමේ ප්‍රතිඵලයක් විදියට දස්කොන්ගේත් ප්‍රමිලාගේත් අසම්මත ආදරේ රජතුමාගේ කණට ගියා කියලා තමයි කියවෙන්නේ. සිදුවීම අවසන් වූයේ දස්කොන් අදිකාරම හිසගසා දැමීමෙන් මරණයට පත් කිරීමෙන්.

ඉතින් කවීන් වුනු මේ දෙදෙනාගේ ආදර හසුන් කොයි තරම් කාව්‍යාත්මක වුනාද කියලා දන්නේ දෙයියෝ තමයි. මේ දෙදෙනා කවියෙන් තම අදහස් හුවමාරු කරගත් බවට සාධක තියෙනවා. ඉතින් මේ ප්‍රේම කතාව අලලා ලියැවුනු ගීතයක් ගැන තමයි මේ කියන්නේ. ඒ කරුණාරත්න දිවුල්ගනේ සමග සමිතා මුදුන්කොටුව ගයන “සක්මන් කරන මලුව පාලුයි දේවී” ගීතය.

හරිම ශෝකී සංගීතයක් තියෙන මේ ගීතයට මම හරිම ආසයි. පද මාලාවත් ඉතාම අගේට වචන ගලපලා කියලා කියන්න පුලුවන්. මේ ගීතය ලියපු කවියා එක්ක බැලුවාම එහි පුදුමයකුත් නැහැ. ඔහු මගේ ගමේම වසන කවියා රත්න ශ්‍රී විජේසිංහයන්. මේ ගීතය සංගීතවත් කරලා තියෙන්නේ ගායකයෙක් විදියට වැඩි ප්‍රසිද්ධියක් තියෙන ගුණදාස කපුගේ ශූරීන් කියලා දැනගත්තොත් ඔබ ඇතැම්විට පුදුම වේවි.

දස්කොන්:
සක්මන් කරන මළුව පාලුයි දේවී
මං විතරයි, ඔබ කිසි දිනෙක නොඒවී

ප්‍රමිලා:
ඉක්මන් ගමන් එපා පා පැකිලේවී
දස්කොන් සකිසඳ මා ඔබේ කුමාරි

දස්කොන්:
සෙංකඩගල වටකල පවුරු වලල්ලේ
පෙම් ගී ගැයු විහඟුන් හැපී වැටෙන්නේ

ප්‍රමිලා:
රන්තරු දෑස පියන රෑ හඳපානේ
අත්තන මලක් වෙලා ඔබ ලඟ ඉන්නේ

දස්කොන්:
වාසල මිණිබැඳි දොර අරින වෙලාවේ
දෑසින් වැටෙන කඳුලු මට සිහිනොවුනේ

ප්‍රමිලා:
ඒ ආදරය ගියත් ඉක්මන් ගමනේ
මා තනිකරන්නෙපා මතු සංසාරේ

මේ තියෙන්නේ සිංදුව. අහන්න නම් සිංදුව මත ක්ලික් කරන්න. ඩවුන්ලෝඩ් කරගන්න නම් රයිට් ක්ලික් කරලා Save Target As කරන්න.

http://www.mp3srilanka.com/files/Karunarathna_Divulgane_Daskon_Pramila.mp3

[ඡායාරූපය: චම්පා බුද්ධිපාලගේ 'දස්කොන්' නාට්‍යයෙන්]

කියන්න ආපු දේ නෙමෙයිනේ මේ කියන්නෙ. මම මේ  කියන්න යන්නෙ ඩ්‍රම්ස් ගහන්න කැමති, ඒත් ගහල බලන්න ඩ්‍රම් සෙට් එකක් නැති අයට පරිගණකය මගින් ඩ්‍රම්ස් වාදනය කරන්න පුලුවන් විදියක් ගැන. මේක software එකක්. මේ ජාතියේ software වලට කියනවා Drum Machine software කියලා. වෘත්තීය මට්ටමෙන් පාවිච්චි කරන මේ වගේ software ගොඩක් තියෙනවා.

සිංදුවක් හොඳින් අහගෙන හිටියොත් වැටහේවි එහි drum වාදනය මුලු ගීතය පුරාම එකම මාත්‍රාවට (beat) එකට යන විවිධ ආකාර වලින් සෑදී තියෙන බව. මේ ආකාර වලට Patterns, එහෙමත් නැත්තම් Styles කියලා කියනවා. drum machine software එකකින් මුලින්ම කරන්නේ මොකක්හරි drum kit එකක් තෝරගෙන ඉන් අපේ වාදනයට අවශ්‍ය patterns ටිකක් හදාගන්න එක. ඊලඟට මේ pattern අතරට දාන fill-in හදාගන්න ඕනෙ. fill-ins කියන්නෙ අර සිංදුවෙ කොටසක් ඉවරවෙනකොට වේගෙන් ඩ්‍රම් එකට තලලා උඩ පැනලා Cymbal එකටත් තලන ටික :D මේ ටික හදාගත්තට පස්සෙ කරන්න තියෙන්නේ ඒ කොටස් ඕනෙ ඕනෙ පිලිවෙලට අමුනලා අපේ වාදනය හදාගන්න එක. මහන්සිවෙලා ඩ්‍රම් එක ගහනවට වඩා කොච්චර ලේසිද බලන්න පරිගණකය ඉදිරිපිට ඉඳන් පුටුවේ වාඩිවෙලා මේ විදියට ඩ්‍රම්ස් වාදනය කරන එක.

මම අද කතා කරන්න යන්නෙ නොමිලේ දෙන එවැනි drum machine එකක් ගැන. ඒ Hydrogen.

Hydrogen කියන්නේ GNU/Linux පරිසරයට හදාපු drum machine software එකක්. (මෙහි Windows version එකකුත් පරීක්ෂණ මට්ටමේ තියෙනවා) මෙබඳු drum machine වල තියෙන වාසිය තමයි විවිධ drum kit වල ඇති ශබ්ද ලබාගෙන styles සැකසීමේ හැකියාව. හරියට ගෙදර drum sets ජාති කීපයක් තියෙනවා වගේ. Acoustic drum kit එකක් ඕනෙ නම් එහෙම, Rock drum kit එකක් ඕනෙනම් එහෙම, Electric drum kit එකක් ඕනෙනම් එහෙම.

ඔබේ ලිනක්ස් පරිසරයේ package manager එකට ගිහින් hydrogen, hydrogen-drumkits කියන පැකේජ 2 සොයලා ස්ථාපනය කරගන්න. Ubuntu වල දි නම්

sudo apt-get install hydrogen hydrogen-drumkits

ඔබේ package manager එකේ මෙය නැත්තම් වෙබ් අඩවියට ගිහින් ලබාගන්න පුලුවන්. http://www.hydrogen-music.org/

Windows සඳහා පරීක්ෂණ මට්ටමේ තියෙන වර්ෂන් එක මෙතනින් ලබාගන්න පුලුවන්

ඔය උඩින්ම තියෙන්නේ pattern editor එක. එතනින් අපිට අවශ්‍ය විදියට කෑලි එකතු කරලා pattern එක හදාගන්න පුලුවන්. වම් පැත්තේ උඩින් තියෙන්නෙ Song editor එක. එතනින් තමයි patterns එකතු කරලා අපිට සම්පූර්ණ සිංදුව හදාගන්න පුලුවන්. පහල තියෙන්නේ Mixer එක. එයින් අපේ drum kit එකේ එක් එක් කොටස් (cymbals, bass drum, etc,) වල ශබ්දය අඩුවැඩි කරන්න වගේම effects යොදන්නත් පුලුවන්.

මුලින්ම කරන්න ඕනේ අවශ්‍ය drum-kit එක තෝරා ගැනීම. මේ සඳහා View > Drumkit Manager වෙත යන්න පුලුවන්.

මෙතැනින් අවශ්‍ය kit එක තෝරාගෙන Load Drumkit එබුවාම ඒ drum kit එක අපිට භාවිත කරන්න ලැබෙනවා.

Pattern editor එකේ වම් පැත්තේ පෙන්නන්නේ අපි තෝරාගත් drum kit එකේ නාද කොටස්. මේ grid එකේ ක්ලික් කිරීමෙන් ඒ ස්ථානයට අර නාදයන් එක්කරන්න පුලුවන්. ඒ විදියට මාත්‍රාවට අනුව එක්කිරීමෙන් pattern එක ගොඩනගාගන්න පුලුවන්.

Song editor එකේදී අර සාදාගත් pattern කොටස් එකිනෙක පිලිවෙලට තියලා මුලු song එකම හදාගන්න පුලුවන්.

පැකේජයත් සමග එන drum kits හොඳ මදි නම් ඔබට පුලුවන් තවත් drum kits රාශියක් ලබාගන්නට මෙතැනින්.

Roland TR-909 කියන ඩ්‍රම් මැෂින් එක පාවිච්චි කරලා Hydrogen වලින් මම හදපු පොඩි සාම්පල් එකක් මෙන්න, අහලා බලන්න. (මේක මේ පෝස්ට් එකට දාන්න ඕනෙ නිසා හදිස්සියට හැදුවේ, චාටර් ඇති)

දැන් ඔබට මීටපස්සෙ සිංදුවක් remix කරන්න එහෙම ඕනෙනම් වෙන වෙන තැන්වලින් drum loops හොය හොය ඉන්න අවශ්‍ය නෑ. Hydrogen වලින් තමන්ගෙම loops හදාගෙන remix කරන්න පුලුවන් :)

මෙන්න මම කැමතිම ඩ්‍රම්ස් වාදකයා වන චාලි ඇඩම්ස් (Yanni’s band member) ගේ drum solo එකක්. මේක Live at Acropolis කියන Yanni ගේ concert එකේදි කරපු වාදනයක්.

ඇස් පියාන  දෑත් පටලවාන අපි
එදා ආදරයෙන් හිටි හැටි මතක් කරමු,
එදා එතරම් ආදරයෙන් හිටි අපිට අද,
එකිනෙකාට “ආදරෙයි” කියාගන්න වත් බැරි වීම
කොයිතරම් දුකක්ද?

ජැකී චෑන්ගේ The Myth හෙවත් San Wa චිත්‍රපටය බලපු අයට ඒකෙ තිබුණු ලයාන්විත ප්‍රේම ගීතය, Endless Love (Mei Li De Shenhua) මතක ඇති. ඒක එක අතකින් ප්‍රේම ගීතයක් වගේම තවත් අතකින් විරහ ගීතයක්. ඒ ඇයි කියලා චිත්‍රපටයේ ලස්සනට කියැවෙනවා. වැඩි දෙනෙක් මේ ලස්සන චීන ගීතය අසා නැති බව මට විශ්වාසයි. ඒ නිසා මම අද මේ ගීතය අහමින් ඉන්නකොට කල්පනා කලා අනිත් අය එක්ක මේක බෙදාගන්න.

මේ ගීතයේ variation 2ක් තියෙනවා. පලමුවෙනි එක ගයන්නේ ඇත්තටම චිත්‍රපටයේ ප්‍රධාන චරිත රඟපාන ජැකී චෑන් හා කිම් හී-සියොන්. ලංකාවෙ නලු නිලියො වගේ නෙමෙයි පිටරට නලු නිලියන්ට කොයි කරම් ලස්සනට සිංදු කියන්න පුලුවන්ද කියලා මේක ඇහුවාම හිතෙනවා :D

දෙවැනි variation එක ගයන්නෙ කොරියානු ගායක දෙපොලක් වන Sun Nan and Han Hong විසින්. චිත්‍රපටයේ OST (original soundtrack) එකේ අඩංගු වෙන්නේ මේ variation එකයි.

මෙන්න පලමුවෙනි variation එක අහලා බලන්න, බාගන්න නම් රයිට් ක්ලික් කරලා Save target as යන්න
http://elaira.net/lagu/endlesslove.mp3

දෙවැනි variation එකට නම් අහන්න තැනක් හොයාගන්න බැරිඋනා. මෙතනින් බාගන්න නම් පුලුවන්: http://tinyurl.com/23ct2v

මෙන්න ගීතයේ වීඩියෝ එක Youtube HD වල, HD වීඩියෝ බලන්න කැමති අයට බාගන්න පුලුවන්, http://www.youtube.com/watch?v=C5d78EQrEOg&hd=1

මෙන්න මේ ලින්ක් දෙක සංගීත භාණ්ඩ වාදනය ගැන උනන්දුවක් දක්වන අයට පමණයි :D මේ accoustic ගිටාරයකින් මේ ගීතය වයන අවස්ථාවක්, සහ මේ electric ගිටාරයකින් මේ ගීතය වයන අවස්ථාවක්.

සිංදුව බාගෙන අහලා රසවින්දා නම් ඒක මාත් එක්ක බෙදාගන්න කමෙන්ට් එකක් දාන්නත් අමතක කරන්න එපා.

මේවා මම උසස්පෙල කරන කාලෙ Yamaha PSR-320 හා Yamaha PSR-510 වර්ගයේ කීබෝඩ් දෙකකින් පර්යේෂණ මට්ටමෙන් කරපු අනුවාදන ටිකක්. කීබෝඩ් දෙකත් මගේ නෙමේ. මිතුරියන් දෙදෙනෙක්ගෙන් පොඩ්ඩකට කියලා ඉල්ලාගෙන මාස දෙකතුනක් තියාගත්ත ඒවා. රෙකෝඩ් කලේ හරිම අමාරුවෙන්. ඒ කාලෙ මට මැෂිමක් තිබුනෙ නෑ. ගෙදරදි ප්‍රැක්ටිස් වෙලා කීබෝඩ් දෙකම උස්සගෙන යනවා අතිජාත මිත්‍රයා යොහාන්ලැයි ගෙදරට. එහේ ඉඳන් ප්ලේ කර කර රෙකෝඩ් කරනවා කීබෝඩ් එකේම තියෙන ට්‍රැක් වලට. (මොකද පරිගණකයේම මල්ටි-ට්‍රැක් රෙකෝඩිං සොෆ්ට්වෙයා එකකින් වැඩ කරන්න තරම් මිත්‍රයගෙ මැෂිමෙ මෙමරි මදි) ඊටපස්සෙ මැෂිමට ඉන්පුට් දීලා අර ට්‍රැක් ප්ලේ කරන ගමන් ඉතිරි කොටස් ඒ වෙලාවෙම ලයිව් ගහලා තමයි රෙකෝඩ් කලේ. රෙකෝඩ් කරන්න පාවිච්චි කලේ Creative Soundblaster කාඩ් එකත් එක්ක ආපු මොකක්ද පොඩි ටූල් එකක්.

මේවයෙ සෑහෙන්න අඩුපාඩු තියෙනවා. අදටත් මට හොඳ කීබෝඩ් එකක් නෑ. ප්‍රැක්ටිස් එක මලකඩ නොකා පරිස්සම් කරගන්නෙ කැම්පස් එකේ තියෙන පියානෝ එක ගහල. කැමති නම් අහලා බලල, කැමති නම් බාගන්න. කැමතිනම් අදහස් කියන්නකෝ.
(ඩවුන්ලෝඩ් කරගැනීමට නමි right click කර Save Link As… කරන්න)

ගමට කලින් හිරු – කරුණාරත්න දිවුල්ගනේ

අන්දර යායේ – කරුණාරත්න දිවුල්ගනේ

වලා තීරයෙන් එහා – ටී. එම්. ජයරත්න

නුඹේ කඳුලට – 6th Lane

සුපෙම් හැඟුම් – ප්‍රදීපා ධර්මදාස/ලක්ෂ්මන් විජේසේකර

මල් මල් හිනා – ෂර්ලි වෛජයන්ත

කීබෝඩ් දෙක ලබාදී උදව් කරපු චතුරිකා හා මිහිරි සොයුරියන් දෙදෙනාත් මේ වෙලාවේ මතක් නොකර බැහැ.

බ්‍රිතාන්‍ය-සිලෝනයේ ධජය

අපේ සිරිලංකාව වගේ රටකට තව කාලාන්තරයක් යනතෙක් කාලීන වැදගත්කමක් තියේවි කියලා හිතෙන ගීතයක් තමා මේ. බලන්න අහල තියෙනවාද කියලා.

සිංදුව අහන්න මේකෙන්:

හත් මුහුදින් එපිට ගුගුරුවා බතරොයි උගුරුදණ්ඩ
හත්දෙයියන් බලා ඉද්දි සුද්දො ආවෙ රට කරන්ඩ
මහත්වරුනි දන්නවාද සුද්දො ආවෙ රට කරන්ඩ

ඇත්දත් ගම්මිරිස් කුරුඳු මැණික් අරං එතෙර යන්ඩ
ලක් මවුනගෙ දරු පැටවුන් වහල් කමේ තියාගන්ඩ
වැව් බිඳ රන් කොත බිම ලා දාගැබ පිට කොඩි දමන්ඩ
මහත්වරුනි දන්නවාද සුද්දො ආවෙ රට කරන්ඩ

යෝද කඳු වලලු වටලා වනහිස මුඩු බිම් කරන්ඩ
කෝපි තේ රබර් වවලා එතෙර එදේසෙට යවන්ඩ
ඉර නොබහින පොලොව වටේ කතිර කොඩිය ලෙල දෙවන්ඩ
මහත්වරුනි දන්නවාද සුද්දො ආවෙ රට කරන්ඩ

සත්තු වගේ මඩ කාගෙන දිව කාගෙන බර අදින්ඩ
උත්තම අධිරාජ්ජෙකට ජීවිත පූජා කරන්ඩ
අනේ අපොයි අපිත් ගියා පය පාමුල වාල් වෙන්ඩ
මහත්වරුනි දන්නවාද සුද්දො ආවෙ රට කරන්ඩ

හත් මුහුදින් එපිට ගුගුරුවා බතරොයි උගුරුදණ්ඩ
හත්දෙයියන් බලා ඉද්දි සුද්දො ආවෙ රට කරන්ඩ
මහත්වරුනි පේනවාද අදත් එනව රට කරන්ඩ

ලිව්වේ: රත්න ශ්‍රී විජේසිංහ
සංගීතවත් කලේ: රෝහණ වීරසිංහ
ගයන්නේ: සුනිල් එදිරිසිංහ
ඇල්බමය: “අලුත් වැස්සක්”

කැමති අය මෙතැනින් සිංදුව බාගන්න.

සිංදුව ගැන ඔබේ අදහස් මෙතන සටහන් කරල ගියාට කිසිම පාඩුවක් වෙන්නෙ නෑ :)

Download: http://www.esnips.com/doc/51f03220-9629-4f10-86b5-244dfe41be6a/Tere-Bina-(Pravins-Remix)

Aao Na (Pravin’s Remix)
මෙය Kyun! Ho Gaya Na? (2004) චිත්‍රපටයේ ගීතයක්. ගයන්නේ සාධනා සර්ගම් හා උදිත් නාරායන්. සංගීතය ශංකර්-එසාන්-ලෝයි ත්‍රිත්වයෙන්.

Download: http://www.esnips.com/doc/88f75305-6613-4eb7-a227-14812db5f3c0/Aao-Naa-(Pravins-Remix)

අහල බලල අදහස් කියන්නකෝ.

ඔබට සිංදු කියන්න පුලුවන්, ඒත් සංගීත භාණ්ඩයක් වාදනය කරන්න බැරිද ? ඒත් ඔබට ඕනෙද ඔබ ගයන ගීතයකට සංගීතය මුසු කරන්න ? සංගීත දැනුමක් නැතුව එය කරගන්න මෙන්න අලුත්ම මෘදුකාංගය. Microsoft SongSmith.
මෙ‍මගින් ඔබ මයික්‍රොපෝනයට ගීතය ගයන විට මෘදුකාංගය ස්වයංක්‍රියවම එයට අදාල harmony අනුකූලව සංගීතය නිර්මාණය කරාවි. ඔබ කවර ලෙසකින්වත් වෙහෙස වියයුතු නැහැ.
තවමත් පර්යේෂණ මට්ටමේ (beta) පවතින මෙය පලමුවරට ප්‍රකාශයට පත් කරනු ලැබුවේ මෙම ජනවාරි මස මාධ්‍ය සාකච්ඡාවකදී.
මෙහි අත්හදා බැලීමේ සංස්කරණයක් ඔබට නොමිලේ ලබාගතහැකියි මෙම අඩවියෙන්.
http://research.microsoft.com/en-us/um/redmond/projects/songsmith/download.html

මෙය ගැන නිල වීඩියෝ එක නරඹන්න මෙතනින්.