අන්තර්ජාලයේ වැඩ කරද්දී නිතරම අපේ files බැක් අප් තියාගන්න, එහෙමත් නැත්තම් ඒවා තව කෙනෙක් එක්ක බෙදාගන්න ඒවා තියන්න ඉඩකඩ ඕනෑ වෙනවා. තේරෙන විදියට කිව්වොත් file hosting space එකකට upload කරන්න වෙනවා. ඒ සඳහා ඉඩ කඩ සපයන විවිධ අඩවි (“දත්ත ගබඩා” කියලා මම කියන්නම්) ගැන පොඩි හැඳින්වීමක් මේ.

ගොඩක් දෙනෙකුට මුලින්ම මතක් වෙයි Rapidshare අඩවිය. ඒත් ඒක එච්චර හොඳයි කියලා මට හිතෙන්නෙ නෑ. ඒකෙන් අපිට බාගත කරගන්න ලොකු කට්ටක් කන්න වෙනවා. (බොහෝ දෙනෙක් එහි free userලා නිසා) Megaupload, Easyshare, Uploding, Sendspace වැනි අඩවි ගැන කියන්න තියෙන්නෙත් ඒ ටිකම තමයි. කැමති නම් උත්සාහ කරලා බලන්න.

මම දැකපු හොඳම දත්ත ගබඩාවක් තමයි ADrive. මෙය ලෝබ නැතුව අපට 50GB ප්‍රමානයක ඉඩක් ලබා දෙනවා. නැවත දත්ත බාගත කරනකොට කාලයක් බලන් ඉන්න ඕනෙත් නෑ.

ඔබට Windows Live account එකක් තියෙන්වනම් එහි සේවාවක් වන SkyDrive නොමිලේම ලැබෙනවා. එමගින් 5GB (නිවැරදි කිරීමක්: දැන් එය 25GB ලබාදෙන බව එම අඩවියේ සඳහන්) ඉඩක් ලැබෙනවා.

DriveHQ තවත් හොඳ දත්ත ගබඩාවක්. එය ලබාදෙන්නේ නම් 1GB ප්‍රමානයක් විතරයි. ඒත් එය සපයන file manager වැඩසටහන පරිගණකයේ පිහිටුවා ගැනීම මගින් පහසුවෙන් ඔබේ ගොනු කළමනාකරණය කරන්න පුලුවන්. ඒ වගේම ඔබට real email account එකක් (yahoo, gmail වැනි free ඒවා නොවන, ඔබේ සේවා ස්ථානයෙන් සැපයූ විද්‍යුත් ලිපිනයක්) තිබේ නම්, එය භාවිතා කිරීම මගින් ඔබට පුලුවන් direct link සැපයිය හැකි true account එකක් ලබාගන්නට.

4shared අඩවිය ලබාදෙනවා 5GB ප්‍රමාණයක ඉඩක්.

මේ හැර ඔබට පුලුවන් GMail Drive ඔබේ පරිගණකයේ පිහිටුවා ගැනීමෙන් GMail ලබාදෙන 7GB ඉඩ කඩ ඔබේ දත්ත ගබඩාවක් ලෙස භාවිතා කරන්නට.

මම මෙම අඩවි ගැන විශේෂයෙන් සඳහන් කලේ ඒවා අපේ දත්ත ගොනු පහසුවෙන් කළමනාකරණය කිරීමට folder එකක් වැනි රූපක මාධ්‍ය මෙවලමක් (GUI Tool) ලබා දීම නිසයි. මෙම දත්ත ගබඩා ඔබට බොහෝ ප්‍රයෝජනවත් වෙයි ඔබේ වැදගත් දත්ත බැක්අප් කරන්න. (ඒත් අපේ රටේ upload වේගය ගොඩක් අඩු වීම ලොකු ප්‍රශ්නයක්) මම මේවා ගොඩක් භාවිතා කරනවා මගේ ව්‍යාපෘති බැක්අප් කරන්න. එතකොට හදිස්සියේ කොම්පියුටරේ කැඩුනත් බය නෑ.

ඔබ තවත් කෙනෙකුට file එකක් දීම සඳහා (forum එකක post කරන්න) එය upload කරන්න තැනක් හොයනවා නම් iFile.it භාවිතා කරලා බලන්න. එය බාගත කරන්නාට කරදරයක් නැතිව බාගත කරන්න ඉඩ සලසනවා. බොරුවට විනාඩි ගනන් බලන් ඉන්න ඕනෙ නෑ.